عمران خان کی لاہور ہائیکورٹ سےدہشت گردی کے 2 مقدمات میں حفاظتی ضمانت منظور

 

عمران خان کی لاہور ہائیکورٹ سےدہشت گردی کے 2 مقدمات میں حفاظتی ضمانت منظور

لاہور ہائی کورٹ  نے آج پی ٹی آئی کے چیئرمین عمران خان کو فیڈرل جوڈیشل کمپلیکس  میں گزشتہ ہفتے ہونے والی جھڑپوں کے بعد اسلام آباد میں دہشت گردی کے دو مقدمات میں حفاظتی ضمانت دے دی۔دارالحکومت کے کاؤنٹر ٹیررازم ڈیپارٹمنٹ (سی ٹی ڈی) اور گولڑہ تھانوں میں درج ایف آئی آرمیں پی ٹی آئی کے سربراہ اور پارٹی کارکنوں پر اسلام آباد میں ایف جے سی کے باہر پولیس پر حملے اور بدامنی پھیلانے میں ملوث ہونے کا الزام لگایا گیا ہے۔لاہور ہائیکورٹ کے جسٹس شہباز رضوی اور جسٹس فاروق حیدر پر مشتمل دو رکنی بینچ نے دہشت گردی کے مقدمات میں عمران کی 27 مارچ تک حفاظتی ضمانت منظور کر لی۔

عمران خان آج دوپہر ایک بجے کے قریب لاہور ہائیکورٹ پہنچے۔ عدالت میں سابق وزیراعظم کی گاڑی مسجد گیٹ سے لاہور ہائی کورٹ میں داخل ہوئی۔پی ٹی آئی چیئرمین کے ساتھ معاون فواد چوہدری، ان کے وکیل بیرسٹر سلمان صفدر اور نجی سیکیورٹی گارڈز بھی موجود تھے۔عمران خان نے ایک بار پھر یہ دعویٰ کیا ہے کہ ان کی جان کو خطرہ ہے، یہ کہتے ہوئے کہ موجودہ حکمران انہیں قتل کرنا چاہتے تھے اور ہفتہ کو توشہ خانہ کی سماعت کے موقع پر اسلام آباد جوڈیشل کمپلیکس میں ایک "جال" بچھایا گیا۔ عمران خان گزشتہ سال ایک قاتلانہ حملے میں بال بال بچ گئے تھے اور انہوں نے حکومت اور فوج کی اعلیٰ شخصیات کو اس کا ذمہ دار ٹھہرایا تھا۔

عدالت پہنچنے کے فوراً بعد عمران خان پہلی بار جسٹس طارق سلیم شیخ کے سامنے پیش ہوئے کیونکہ عدالت نے 18 مارچ کو زمان پارک میں ان کی رہائش گاہ پر پولیس آپریشن کے خلاف پی ٹی آئی کی توہین عدالت کی درخواست کی سماعت کی۔سماعت شروع ہوتے ہی جسٹس طارق سلیم شیخ نے عمران خان کے ساتھ عدالت میں موجود گارڈز کے بارے میں استفسار کیا جس پر فوادچوہدری نے جواب دیا کہ وہ عمران خان کی ’ذاتی سیکیورٹی‘ کا حصہ ہیں۔تاہم جج نے گارڈز کو کمرہ عدالت سے باہر جانے کی ہدایت کرتے ہوئے کہا کہ سیکیورٹی کے لیے پولیس اہلکار پہلے سے موجود ہیں۔

سماعت کے دوران ایک موقع پر عمران خان روسٹرم پر پیش ہوئے اور 18 مارچ کے واقعات کودہراتےہوئے کہا کہ اس دن ان کی اہلیہ گھر میں اکیلی تھیں اس کے باوجود پولیس نے ان کے گھر کی کھڑکیاں توڑ دیں۔میں اسلام آباد ٹول پلازہ پر پہنچا اور انہوں نے میرے گھر پر حملہ کر دیا۔ میری بیوی ایک با پردہ عورت ہے، اس کی آواز کیمرے میں ریکارڈ کی گئی ہے۔انہوں نے عدالت کومزید بتایا کہ ’’متعدد جگہوں پر رکاوٹیں کھڑی کی گئیں تاکہ میں عدالت وقت پرنہ پہنچ سکوں‘۔عمران خان نے کہا کہ میں آج چپکے سے عدالت پہنچاہوں میں اس گاڑی میں آیا جس کے بارے میں کوئی نہیں جانتا، بغیر کسی قافلے کے، عمران نے مزید کہا کہ یہ سب کرکے حکومت نے دنیا کو کیا پیغام دیا۔انہوں نے صرف ایک پیغام دیا ہے کہ قانون کی حکمرانی نہیں ہے۔

اس پر عدالت نے حکومتی وکیل کو حکم دیا کہ وہ زمان پارک آپریشن سے متعلق ہدایات لیں اور عدالت میں پیش ہوں۔ جسٹس طارق سلیم شیخ نے کہا کہ میں ان تمام لوگوں کے خلاف توہین عدالت کی کارروائی شروع کروں گا جو میڈیا میں بیٹھ کر عدلیہ کا مذاق اڑا رہے ہیں۔

انہوں نے وارننگ بھی دی کہ اگر کیس میں مدعا علیہان نے عدالت کا احترام نہ کیا تو کارروائی کی جائے گی۔ جج نے مزید کہا کہ ہمیں قانون کے مطابق کام کرنا ہے، ہم صرف وہی سنتے ہیں جو قانون کہتا ہے۔لاہور ہائیکورٹ کے جسٹس طارق سلیم شیخ نے آج پی ٹی آئی کی جانب سے سابق وزیراعظم کے خلاف مقدمات کا ریکارڈ طلب کرنے کی درخواست کی سماعت کی۔سماعت کے دوران پولیس نے عدالت میں رپورٹ پیش کی جس میں بتایا گیا کہ عمران خان کے خلاف پنجاب میں 6 مقدمات درج ہیں۔ ان میں سے تین ایف آئی آر لاہور کے ریس کورس تھانے میں درج کی گئی تھیں، جب کہ دیگر تھانہ سرور روڈ، راولپنڈی کے نیو ایئرپورٹ تھانے اور فیصل آباد کے مدینہ ٹاؤن تھانے میں درج کی گئی تھیں۔تاہم جسٹس شیخ نے پولیس کو ہدایت کی کہ وہ عمران کے خلاف ایف آئی اے اورنیب کی جانب سے درج مقدمات کی تفصیلات بھی جمع کرائیں۔

جج نے ایف آئی آر کی تاریخوں کے بارے میں بھی استفسار کیا اور پوچھا کہ ہر روز ایف آئی آر درج کی جا رہی ہیں کیا رپورٹ میں تمام تازہ شکایات بھی شامل ہیں۔پولیس نے جواب دیا کہ رپورٹ میں کل تک درج کی گئی تمام ایف آئی آرز شامل ہیں۔"تمام تفصیلات فراہم کرنے میں کیا مسئلہ ہے؟ آج واٹس ایپ کا وقت ہے… آپ ایک منٹ میں سب کچھ تلاش کر سکتے ہیں،‘‘ جج نے ریمارکس دیئے اور پھر سماعت دوپہر 1 بجے تک ملتوی کر دی۔انہوں نے پولیس کو کیس کا مکمل ریکارڈ عدالت میں پیش کرنے کی بھی ہدایت کی۔سماعت دوبارہ شروع ہوئی تو جسٹس شیخ نے حکومتی وکیل سے کہا کہ عمران کے خلاف درج مقدمات کی تفصیلات کے ساتھ بیان حلفی جمع کرائیں۔جج نے کہا کہ دو دن میں تفصیلات جمع کریں اور درخواست گزار کو ریلیف بھی دیں۔ ’’یہ ممکن نہیں کہ آپ سماعت میں تاخیر کریں اور راحت بھی نہ دیں۔‘‘

لاہور ہائیکورٹ سے روانگی سے قبل عمران نے توشہ خانہ تحقیقات میں قومی احتساب بیورو (نیب) کی جانب سے انہیں بھیجے گئے دو سمن میں ضمانت بھی حاصل کر لی تھی۔

توشہ خانہ تحائف کیس میں نیب راولپنڈی نے پی ٹی آئی کے سربراہ کو 9 اور 21 مارچ کو بیانات ریکارڈ کرانے کے لیے بلایا تھا۔ عمران پر الزام ہے کہ اس نے مختلف غیر ملکی شخصیات کی طرف سے انہیں دیے گئے کچھ سرکاری تحائف اپنے پاس رکھے ہوئے تھے، جن میں رولیکس کلائی گھڑیاں بھی شامل تھیں، جنہیں اس نے مبینہ طور پر تھوڑے داموں خریدا اور پھر لاکھوں روپے میں فروخت کیا۔

آج دائر کی گئی اپنی درخواستوں میں، عمران خان نے کہا کہ نیب کی طرف سے کال اپ نوٹس "واضح طور پر جواب دہندگان  یعنی نیب کے مذموم عزائم کی نشاندہی کرتے ہیں جو درخواست گزار کو "جھوٹے اور غیر سنجیدہ کیسز" بنا کر گرفتار کرنے پر بضد ہے۔جسٹس علی باقر نجفی کی سربراہی میں دو رکنی بنچ نے عمران خان کی درخواست پر سماعت کی۔

سماعت کے دوران پی ٹی آئی سربراہ کے وکیل نے عدالت کو بتایا کہ نیب عمران خان کو پہلے بھی ایسا ہی نوٹس جاری کرچکا ہے، جس میں کہا گیا تھا کہ 'جیسے ہی ہم ضمانتیں لیتے ہیں، وہ ہمارے خلاف ایک اور مقدمہ درج کرتے ہیں'۔انہوں نے استدعا کی کہ عمران خان کو 15 دن کی حفاظتی ضمانت دی جائے کیونکہ عمران خان کو اسلام آباد کی عدالت میں پیش ہونا تھا۔اپنی طرف سے عمران خان نے جج کو بتایا کہ [پنجاب میں] انتخابات کی تاریخ کا اعلان ہو چکا ہے لیکن ان کا پورا وقت عدالتی سماعتوں میں گزررہا ہے انہوں نے مزید کہا کہ وہ پارٹی ٹکٹ تقسیم نہیں کر سکے۔ان کا مزید کہنا تھا کہ ان کے خلاف 50 سال میں ایک بھی مقدمہ درج نہیں ہوا لیکن صرف ایک ماہ میں 100 کے قریب مقدمات درج کر لیے گئے۔ عدالت نے دلائل سننے کے بعد عمران کی 31 مارچ تک حفاظتی ضمانت منظور کر لی